王祖藍最近為自導自演賀歲片《你咪理，我愛你！》四出宣傳，日前接受商台《1圈圈 星光背後》訪問，提到當年為何有勇氣追求05年華姐冠軍李亞男，祖藍直言因為太愛，即使沒有勝算，也要拼命一試。
他說﹕「我哋係06年透過藝人之家認識，我決心追佢，除咗因為靚，我仲好想有個好乖嘅伴侶管束自己。我有諗過我哋唔匹配，佢嗰個年紀，一定係喜歡王力宏嗰種俊男，點會鍾意我呢？通常男仔唔敢追一個女仔係因為怕瘀，冇勝算嘅話一個男仔係唔會追一個女仔，但我覺得佢已經好到一個地步，我係唔怕瘀，所以就追佢。嗰次被拒絕後，我係喊到停唔到眼淚，我係有心理準備失敗，但我唔介意面子，但仍然會傷心，因為真係好喜歡佢，佢差少少就同我喺埋一齊。」
三年後，二人卻巧妙地因緣份再次走在一起，祖藍自覺是神的安排：「後來教會有個Trip請我哋去美國，我當時好驚，因為花咗三年時間去忘記佢，但點解又被安排呢個Trip，畀我同佢一齊去呢？我記得當時我仲去搵樂小姐，推薦亞男去參加《舞動奇蹟》，其實我係想使開佢。本身佢都答應咗，點知有日佢起身一落床就拗柴，三個月唔能夠跳舞，所以佢就去教會嗰個Trip。既然三年嚟大家都喜歡對方，就唔係衝動，更認識真正嘅對方，所以就決定喺埋一齊。」
新婚不久，祖藍就要到大陸拍劇三個月，當時有傳太太因此情緒出現問題。
被問及會否怕在大陸惹來狂蜂浪蝶？祖藍直言有自知之明及對自己有信心：「傻啦！我唔會呃自己，一來我自己係唔會畀呢種機會發生，我去邊佢都知道，我身邊嘅同事都好錫亞男，係唔會放過我。就算真係有呢種女仔打電話畀我、Flirt我兩句，你唔好當我係小朋友，我已經過咗嗰個年紀。唔通貪我靚仔咩？你對我有興趣，唔通因為我有才華？我同亞男十年感情，點會因為一個眼神，就好似搵番青春一樣？另外就係我會確保自己嘅婚姻冇問題，如果覺得老婆好悶，成日嘈交，返到屋企都已經冇咗浪漫，感情轉淡，先會有機會有婚外情，所以我同亞男之間會懂得保鮮。」
(apple daily)
