琦琦、徐子珊、方力申（小方）、歐鎧淳等今日喺淺水灣出席「第十三屆點滴揹水行」，小方表示家人都有嚟一齊參與，佢話：「母親節當日要開工，唔喺香港，所以預早慶祝，今日只係行半個鐘，所以好啱一家大細來。」

佢又憶起2014年母親節當日，居住北京嘅婆婆因為肺癌病逝，佢話：「婆婆捱到母親節嗰日先離開，令我哋個個都記得呢一日。」呢兩年，媽咪會唔會反而唔想慶祝母親節？小方話：「唔會，生老病死一定有，婆婆揀呢一日走有佢意思同意義，佢希望大家會記住母親節呢一日。」

小方更寄語大家要珍惜眼前人，多抽時間陪屋企人，亦叮嚀父母要定期身體檢查。婆婆嘅病逝，會唔會令媽咪更加想小方快啲成家立室？佢話：「唔會，睇緣份啦，要我啱佢，佢啱我先最重要，結婚唔難，維繫家庭先最難，身邊都有朋友婚姻失敗，所以唔一定要行到呢一步。」