51歲嘅「海潮」溫碧霞上周突爆同結婚十七年嘅何祖光分居後，之後佢啱啱有工作要外出，當時佢喺機場都好大方咁停下來接受傳媒訪問，見佢臉容憔悴，講到分居，佢當時咁話：「17年嘅感情，唔係話分開就可以分開…」，今日有周刊就話佢哋分居嘅原因除咗係工作上有分歧外，仲話兩度影到何祖光，趁溫碧霞返大陸工作時，約會一名貌似前港姐冠軍郭藹明嘅中女。

溫碧霞婚後依然活躍於娛樂圈，近年就轉戰大陸，見佢不時會返大陸工作，上周突然爆出佢同老公分居，好多人都感到愕然，事後溫碧霞就離港工作，當時佢回應分居時，話17年感情唔係話分就分，咁問佢係咪會俾機會老公時，佢就話：「我諗…我諗…發生咗呢件事後，我發覺係最緊要係大家開心囉。開心真係最緊要㗎！我希望我哋兩個都要開心，我亦都希望我哋最緊要係大家都要珍惜對方囉！」

今日有周刊指，溫碧霞同老公分居嘅主要原因，係何祖光不滿溫碧霞經常返大陸工作，而女方就唔肯為家庭而放棄事業，咁分歧就越來越大，關係就越來越僵啦！周刊報道入面，仲話曾經影過何祖光，兩次相約一名貌似郭藹明嘅中女出街，話佢哋行街、食飯，按腳，非常疏肝咁話。而周刊亦有就事件問番溫碧霞，報道就話溫碧霞依然好維護老公，話佢都認識嗰位中女，仲話呢啲係好正常嘅社交，完全唔介意喎！

(蘋果日報)