因為係暪住屋企人入紙。。。
現年26歲、2012年落選港姐尤蔭蔭，早前入紙申請與圈外男友梁揚提結婚。當記者致電講恭喜時，蔭蔭卻甚為緊張，坦言係暪住屋企人入紙，之後便匆匆收線。
相隔一日，《蘋果》記者再致電蔭蔭，佢話婚事要延期，佢解釋：「雖然申請咗，但因為屋企發生咗啲事，所以會延遲簽紙，到確認結婚日期才通知大家。」再三追問下，蔭蔭坦承家人反對佢太早結婚，佢話：「佢哋覺得我仲細個，加上希望男友事業穩定啲先，咁就遲啲啦。」
蔭蔭比男友細12年，佢透露對方係台灣人，從事金融行業，兩人拍拖已經4年，不過蔭蔭一向對感情事好低調，IG連一張拍拖相都冇。
蔭蔭透露早前同男友一齊去日本旅行，對方跪地向佢求婚，佢話嗰一刻真係好感動：「當時佢帶咗我去一個好靚嘅湖邊，最初唔知佢搞乜，原來係set緊鏡頭，佢突然跪地向我求婚，仲話呢個地方佢曾經嚟過，以前就諗住帶同佢一生一世嘅人嚟呢度，咁我就應承咗。」
蔭蔭現在喺奇妙電視嘅主播，同屆港姐冠軍張名雅已為人妻，而亞軍黃心穎同季軍朱千雪亦名花有主。
(蘋果日報)
