「曙光全部熄滅，殺掉我影子，我只能獨處，背後全沒有支柱！甚麼叫絕望，抬起眼望望，如今我在你面前呈堂，隨便收看…」看着歌詞，哼得出旋律！○三年的〈絕〉紅了傅珮嘉，卻令人遺忘了，她出道後翌年，為張栢芝主唱的〈星語心願〉填詞，曾榮獲第十九屆香港電影金像獎的「最佳電影歌曲」獎。
歌手傅珮嘉（即傅又宣，Maggie）到電台宣傳新歌《Better This Way》。Maggie話新歌靈感原本是來自老公常常已讀不回她的訊息：「開頭係因為我想做啲唔同風格唔同嘅歌，然後我諗起我老公成日睇完訊息都唔覆，明明見到佢剔晒但就係唔覆，就算幾忙，少少時間都有啩，佢就成日都話諗住晏啲先，我好唔鍾意人哋睇完唔覆，就有歌詞寫出來就作咗呢首歌，但其實最後首歌係叫人要向前看，唔好因為少少事情就停止咗自己嘅人生。（老公知唔知你嘅不滿？）依家做咗訪問應該就知，但佢係巨蟹座，典型好好先生，都唔會有咩反應。」
實力唱將 多次獲讚
Maggie淡退香港樂壇，2012年《Concert YY 黃偉文作品展》邀請咗 傅珮嘉 重新演唱Wyman的經典作品。當中「垃圾系列」甚爲著名，彭羚、盧巧音及容組兒都曾演繹該系列歌曲，而喺作品展中，Maggie都完美演繹〈絕〉一曲。當時佢更獲激讚，話晒咁耐冇喺樂壇露面，仍然可以發揮水準，絕對係一個實力唱將！
久未在港露面的Maggie原來一直同老公同阿仔定居香港：「好多人以為我住台灣，其實我老公來香港定居已經八、九年，但上年就成年都喺台灣跑校園騷，嚟緊三月會返嚟出番廣東歌，(老公有冇掛住你？)我一直以為佢唔Care，因為我有幫佢處理餐廳嘅生意，好多工作時間會一齊，但佢後來同我講不如你返多啲來香港，我先知佢介意，都幾冧。」問到有冇在香港開騷的計劃，她就說暫時沒有，要等出廣東歌後的成績再決定。
(東方新地 / on.cc)
