能夠講出「人生有幾多個十年」都好豪氣，但現年68歲的「小調歌后」奚秀蘭，今年為紀念入行50周年，特別製作一張「奚秀蘭50年經典珍藏卡拉OK原聲4D首版」。接受《蘋果》訪問當日，奚秀蘭五倍豪氣講出：「人有幾多個五十年？」
「光陰似箭，我嘅精采人生，有苦有樂，好難忘，我冇後悔。我用歌聲唱咗好多好歌，帶歡樂畀觀眾。」奚秀蘭永不言休，唔排除70歲會踏上紅館。回想當年17歲參加歌唱比賽奪冠，奚秀蘭一鳴驚人闖娛圈，「67年香港暴動，當年搵份工好難，我好幸運加入電視台，當年嘅人好單純，冇咁複雜，但過咗兩年，人多咗，大家先爭出位。」奚秀蘭入行半世紀，從未出過卡拉OK碟，佢話呢張紀念碟收錄咗佢五十年嚟舞台演出嘅美好回憶。
不過依家網絡發達，出碟即有機被抄掟上網，「即使血本無歸，我都希望有生之年，可以將我心血送畀粉絲，人生中咁多知音人，係好大滿足感，我樂意為佢哋歌唱。」奚秀蘭講講吓，仲技癢清唱了首本名曲《天女散花》。為奚秀蘭出碟，出錢出力最多係佢背後男人－－結婚39年丈夫謝嘉亮。奚秀蘭話：「我哋夫婦將僅有一筆基金捐出嚟，由做第一輯專輯開始一路run住，收益就做慈善用途。我對音樂編曲要求都高，又要拍得靚，不計金錢，希望有人聽，我就製作，只要喜歡聽，我就繼續唱落去。」
訪問進行中，謝嘉亮一直為愛妻打點，兩人不介意「長短腳之戀」，奚秀蘭合照時更刻意屈膝遷就老公，還合拍做心心甫士。
謝嘉亮當年剛由英國讀書回港，為父親打理家族生意，由奚秀蘭哥哥牽紅線，佢哋一見鍾情，第一次約會，謝嘉亮竟大膽叫奚秀蘭返屋企游水。
藝人要嫁入豪門絕唔容易，老爺當年棒打駌鴦，不惜用炒魷迫囝囝分手。當年紅透嘅奚秀蘭同樣遭家人反對。太子爺謝嘉亮最後為真愛離家出走，兩人在沒有家人祝福下，在教堂行禮，組織二人世界。謝嘉亮獨自打江山，奚秀蘭夫唱婦隨，橋段頗「粵語長片」。「老爺當年唔睇好我哋，佢話最多半年，或一年就離婚，最後睇到我哋結婚咁耐，佢最後拍住仔膊頭同佢講『都係娶番個高嘅好』。」因為老爺第三段婚姻，也娶了跟奚秀蘭一樣高度嘅「高妹」，所以才有此言。娛圈近年都有多對「長短腳之戀」模範夫妻，奚秀蘭話：「王祖藍同李亞男拍拖時都有同我老公講：『大姐夫，我以你為標準』，終於佢爭取到。」
兩公婆剛喺日本賞櫻慶祝結婚39周年，奚秀蘭話：「大家都好珍惜，相依為命。當年都好多磨擦同拗撬，每個人都會講錯嘢，但唔好咁執着。如果想愛情成功美滿，每個人都要付出代價，我哋之間互相包容、接納。」兩人婚後未有生育，奚秀蘭解釋：「我先生有先天問題，影響生育，佢結婚第一年知道後好傷心，喊晒話將來老咗，冇人送終，我話佢生仔為咗有人送終，我話我哋先係老夫老妻。」謝嘉亮被愛妻點醒才破涕為笑。
奚秀蘭再話：「查理斯王子話婚姻係為咗share your life，唔生BB都冇遺憾。我哋婚姻係分享對方生活，咁一生先有意思，彼此欣賞對方生活、長處、短處，先係真正婚姻。」奚秀蘭笑言養大一個小朋友要付出好大代價：「我淨係陪住老公，就好似湊一個大仔咁，我都湊咗佢39年咯。佢話我似大女，佢都話忍得我好辛苦㗎。」
(蘋果日報)
