歌手菊梓喬（Hana）於前晚喺勁歌金曲頒獎禮連勇奪六個大獎，包括首奪「最受歡迎女歌星」、「勁歌金曲唱片銷量大獎」、三首歌奪「勁歌金曲獎」及「最受歡迎網絡歌星」，成為全晚大贏家。
不少劇集主題曲、插曲同片尾曲，Hana亦有份參與，當中大受好評的劇集《跳躍生命線》插曲《但願人長久》亦相當受歡迎。
Hana當時以30歲之齡闖樂壇，入行短短兩年火速成為樂壇知名女歌手。
曾經借歌《七歲》細說悽慘童年。接受訪問時坦言自小父母離異，並於她13歲時因為私人原因先後遺棄了自己和妹妹。當時年紀小小的Hana頓失依靠，連基本生活都有困難，一度要停學，要社工幫助下維持生活，其後要打工賺外快。
重提兩姊妹的辛酸日子，HANA忍不住雙眼通紅說：「試過冇錢食飯暈低咗喺條街度，嗰陣時好想讀書，但有錢都會畀咗阿妹讀先，一個公仔麵都要分兩日食，依段時間都維持咗好幾年。」
而Hana於中學時代更被同學排擠及欺凌，最後索性輟學出嚟社會工作，姊兼母職賺錢養妹妹，有指她打過至少二十份工，包括美容院做學徒、餐廳洗碗等等，非常悽慘！
長大後，她一直沒有放棄尋找親生父母，惜重遇時卻發現他們已各自組織了新家庭，更視她們兩姊妹如同陌路人。
Hana憶起跟父母見面的一刻，再次心痛地說：「佢哋話無論依家佢哋嘅家人點樣都與我無關。我從來都冇感受過有爸爸、媽媽嘅感覺，幻想唔到有父母嘅感覺會係點。」
雖然多年缺乏家庭溫暖，HANA坦言從沒有怪責父母，亦無影響到日後組織家庭的想法，只是仍未遇到真命天子。提到《七歲》講述想回到童年，她直言只想透過歌曲讓大家知道幸福不是必然：「以為父母生你出嚟就一定要照顧你？唔係㗎！」
身世坎坷的Hana又不時受「多齒症」困擾，早前病情更一度復發，她講：「我上面啲牙肉腫晒，因為生牙，佢生完一隻就會自己甩，會keep住生一年左右，但啲牙唔係普通牙，係好似殭屍牙，係一條條柱，不過真係會痛。（有冇得醫？）冇得醫，好似十萬個人就有一個人係咁，醫生話冇特別原因點解會有呢個病。」故只能食粥及流質食物。
如今在事業上終於吐氣揚眉，由樂壇新人成為最受歡迎女歌手，變身劇集歌后，可謂苦盡甘來！
（綜合報道 / facebook / on.cc）
