利申，以下呢單嘢，唔係網民搞事0架……而係無綫……
前日呢，劉嘉玲鄭裕玲喺節目中，重提32年前嘅拍《流氓大亨》有人遲到單嘢，今日大年初一，無綫嘅一個fb page，又loop舊聞，呢單「新啲」，係1994年。當年一臉稚氣、只得29歲嘅郭富城，接受祝文君嘅訪問，內容如下：祝文君：今年會唔會派利是？
城城（震驚）：吓？我未結婚喎！
祝文君：嘻！唔使一定結婚0架嘛！
城城：傳統嘅思想就係話呢，係結咗婚先至派利是嘅！（甩一甩頭）我希望有一日，到將來我結咗婚嘅時候我先至派利是吖！
城城：（望向鏡頭）個個都有份！我講過嘅，全港嘅市民，都會收到我嘅利是（舉起手指，語氣肯定）不過可能係好多年之後…由1994年等到依家，等到喇！
咁城城幾時找數、全香港市民一人一封利是？講起城城嘅承諾，仲有一單更經典，但已經講過幾百次，就係……1991年，城城喺台灣度過佢26歲生日，喺歌迷面前立願：「30歲前不會失身！」相當之霸氣。好多年之後，城城為當年誓言解畫，佢話佢嘅意思係：「三十而立之前，要潔身自愛，照顧形象，唔會亂搞男女關係。」城城當年呢個「不失身論」真係好爆，更掀起一段「圈中處男大搜查」風暴，仲辣埋古巨基嗰疊。又係199幾年，一次古巨基出席電台活動，應大會要求即場填寫一份相當詳盡嘅個人資料問卷，裡面竟然問及其性伴侶、性經驗、避孕方法同對一夜情嘅睇法，令基仔「紅都面晒」尷尬話會「照實填」。當時記者問基仔喺有冇性經驗一欄中填咗乜嘢？24歲嘅基仔直言：「咪填冇囉！」……之後基仔又話不贊成一夜情：「一晚之後，對方都唔知去咗邊，我會覺得自己好似好蝕底咁。我唔止要『One Night Stand』（一夜情），我係要『Night Night Stand』（晚晚嚟？）呀！」吓……
(蘋果日報)
