男方愛屋及烏，對囡囡超細心，佢就超坦白咁話：「大家都斯斯文文，又有啲共同朋友，佢今日陪我帶小朋友去打針，雖然未係好識照顧小朋友，不過我識，我欣賞佢有心。」
現年30歲嘅2010年中國小姐香港賽區冠軍趙哲妤（Uny），16年底喺馬來西亞未婚生女，由於囡囡生父唔肯照顧，Uny決定承擔責任做單親媽咪，母兼父職，囡囡跟媽咪姓，改名趙真羽（Natalie），囡囡乳名叫「小魚」，依家1歲多。Uny唔靠人，努力出騷賺奶粉錢養女，不過可惜，小魚早前發現左耳有弱聽情況，心急嘅Uny立即帶囡囡做手術，開刀植人工耳蝸，改善聽力，兩母女依為命。
Uny仲好後生，感情事方面佢話隨緣，遇到啱嘅男人都會結婚，給囡囡小魚一個幸福嘅家，近日Uny被爆同「翻版林峯」Him Wong過從甚密，有指男方係經營海產凍肉供應商，男方好冧Uny，亦好照顧小魚。《蘋果》日前就喺尖沙嘴海港城見到Uny帶埋囡囡小魚同「翻版林峯」Him拍拖Shopping，跟住佢哋仲湊小魚到九龍城聖德肋撒醫院睇醫生，Him成功融入Uny母女嘅二人世界，唔知情真係會以為佢哋係一家三口。
當日所見，Uny同囡囡小魚着住黃色母女裝出動，加埋Him同外傭，一行四人去咗海港城為小魚買新衫同揀玩具，1歲多嘅小魚已學行，Uny陪住囡囡慢慢喺場裏邊行，小魚都好活潑。
佢哋行咗入一間嬰兒服裝店，咁啱做緊七折，小魚大得好快，Uny就幫囡囡揀啲新衫，同行嘅Him都樂於畀意見。Shopping其間，小魚有啲扭計，Uny就帶咗囡囡出店外行吓，由Him埋單。
大約半小時後，佢哋轉去玩具反斗城，Him細心將小魚放上手推車坐，佢負責推住，小魚對呢位Uncle唔抗拒，Uny放心將小魚交畀Him睇實，佢就行開睇嬰兒嘢，Him見到得意玩具，佢就拎去o氹小魚，當正小魚係親生女咁錫。
Uny同新歡Him湊女去完買衫買玩具，佢哋跟住攞車去咗醫院，佢哋入到醫院大堂去咗登記，跟住坐喺梳化度等，但小魚又坐唔定扭計，Uny同Him拖實小魚去行吓o氹佢開心。Him好細心，佢見Uny口罩歪咗，仲替佢整理。
《蘋果》打畀Uny，問佢小魚係咪病咗？Uny話：「小魚唔係病，佢去打歲半針，五合一同甲型肝炎。」對於新歡Him成功融入家中，Uny話：「佢未係男朋友，我哋了解中，穩定啲會大方公開，我始終有個女嘛。」講到Him嘅背景，Uny話：「佢係一個生意人，美國洛杉磯回流返嚟12年，係駝鳥肉供應商。」兩人點認識？Uny坦白話：「幾年前首映認識，大家都斯斯文文，又有啲共同朋友，佢今日陪我帶小朋友去打針，雖然未係好識照顧小朋友，不過我識，我欣賞佢有心。」
(蘋果日報)
